શ્રી ગોવિંદ ગુરુ યુનિવર્સિટી (GGU) ના સત્તાધીશો દ્વારા કરવામાં આવેલા આડેધડ અને અસહ્ય ફી વધારાના પાપે વિદ્યાર્થીઓ અને વાલીઓમાં હોળી સળગી છે. ગરીબ અને મધ્યમ વર્ગના વિદ્યાર્થીઓના ખિસ્સા ખંખેરવાના યુનિવર્સિટીના આ ‘તુઘલખી’ નિર્ણય સામે આજે અખિલ ભારતીય વિદ્યાર્થી પરિષદ (ABVP) એ રણશિંગું ફૂંક્યું હતું. રોષે ભરાયેલા સેંકડો વિદ્યાર્થીઓએ યુનિવર્સિટી કેમ્પસને બાનમાં લઈ ભારે આક્રોશ સાથે એવો પ્રચંડ ‘હલ્લાબોલ’ કર્યો કે સમગ્ર વહીવટી તંત્રના પાયા હચમચી ગયા હતા.
સત્તાના નશામાં ચૂર તંત્ર સામે સૂત્રોચ્ચારથી ગુંજ્યું કેમ્પસ
વિદ્યાર્થી નેતાઓએ આરોપ લગાવ્યો હતો કે, યુનિવર્સિટી અત્યારે જ્ઞાનનું ધામ મટીને ઉઘાડી લૂંટ ચલાવતું કેન્દ્ર બની ગઈ છે. જનતાના ટેક્સના પૈસે ચાલતી સરકારી યુનિવર્સિટીમાં ખાનગી કોલેજો જેવા તોતિંગ ફી વધારા ઝીંકીને વિદ્યાર્થીઓના ભવિષ્ય સાથે ચેડાં કરવામાં આવી રહ્યા છે. કેમ્પસમાં ધસી આવેલા આક્રોશિત વિદ્યાર્થીઓના ટોળાએ ‘શિક્ષણનું વ્યાપારીકરણ બંધ કરો’ અને ‘વિદ્યાર્થી વિરોધી આ નિર્ણય પાછો ખેંચો’ ના ગગનભેદી નારા લગાવી યુનિવર્સિટી ગજવી મૂકી હતી. લાંબા સમય સુધી ચાલેલા આ ઘેરાવ અને ધમાસાણને પગલે કેમ્પસમાં ભારે અફરાતફરીનો માહોલ સર્જાયો હતો.
આ તો માત્ર ટ્રેલર છે, પિક્ચર હજી બાકી છે: આરપારની લડાઈના એંધાણ
ABVP ના હોદ્દેદારોએ સત્તાધીશોની આંખ ઉઘાડવા માટે ભારે આક્રોશ સાથે આવેદનપત્ર ફટકાર્યું હતું અને સ્પષ્ટ શબ્દોમાં ચેતવણી આપી હતી કે, જો આ લૂંટ સમાન ફી વધારો ૨૪ કલાકમાં પાછો ખેંચવામાં નહીં આવે તો આ આંદોલન માત્ર ગોધરા પૂરતું સીમિત નહીં રહે. યુનિવર્સિટી સત્તાધીશોની ઇંટ-સે-ઇંટ બજાવી દેવામાં આવશે અને આગામી દિવસોમાં થનારા કોઈપણ ઉગ્ર પરિણામની સંપૂર્ણ જવાબદારી માત્ર ને માત્ર યુનિવર્સિટી પ્રશાસનની રહેશે.
