ક્રાફ્ટરૂટ્સ છેલ્લા ૨૫ વર્ષથી વધુનો વારસો ધરાવતી અગ્રણી હસ્તકલા સંસ્થા છે.આ સંસ્થા દ્વારા વડોદરા શહેરની ગ્રાન્ડ મર્ક્યુર સૂર્યા પેલેસ ખાતે તા.૬ જાન્યુઆરી થી તા. ૯મી જાન્યુઆરી દરમિયાન યોજાયેલ ભારતીય કારીગરીના અદભૂત હસ્ત કલા પ્રદર્શનને ઉત્તર પ્રદેશના રાજ્યપાલ શ્રીમતી આનંદીબેન પટેલે પ્રારંભ કરાવ્યો હતો.
આ પ્રતિષ્ઠિત પ્રદર્શનમાં ભારતના ૧૫ રાજ્યોમાંથી ૮૦થી વધુ હસ્તકલા રજૂ કરતા ૧૦૦થી કારીગરોની કલાત્મક કૃતિઓ પ્રદર્શિત કરવામાં આવી છે.
ક્રાફ્ટરૂટ્સ, પરંપરાગત હસ્તકલાને જાળવવા અને પ્રોત્સાહન આપવા માટે સમર્પિત, કારીગરો માટે દીવાદાંડી સમાન છે. જે તેના પ્લેટફોર્મ દ્વારા ૩૫ હજારથી વધુ કુશળ વ્યક્તિઓને સશક્ત બનાવે છે. ક્રાફ્ટરૂટ્સે વિવિધ પ્રદર્શનો દ્વારા કારીગરોને તેમના અસાધારણ ઉત્પાદનો પ્રદર્શિત કરવા માટે એક પ્લેટફોર્મ પૂરું પાડીને સ્વદેશી હસ્તકલાને ટકાવી રાખવા અને પુનર્જીવિત કરવામાં મુખ્ય ભૂમિકા ભજવી છે.
પરંપરાગત કારીગરો માટે વાઇબ્રન્ટ ઇકોસિસ્ટમને ઉત્તેજન આપવા માટે ક્રાફ્ટરૂટ્સની પ્રતિબદ્ધતા માત્ર આપણા સાંસ્કૃતિક વારસાને જાળવવામાં જ નહીં પરંતુ સમગ્ર રાષ્ટ્રમાં અસંખ્ય વ્યક્તિઓને ટકાઉ આજીવિકા પૂરી પાડવામાં પણ મહત્વની છે. ગ્રાન્ડ મર્ક્યુર સૂર્યા પેલેસ ખાતેનું પ્રદર્શન મુલાકાતીઓ માટે આકર્ષકનું કેન્દ્ર બની રહેશે, જે ભારતીય હસ્તકલાની વૈવિધ્યસભરતાની ઝલક આપે છે.
આ પ્રસંગે ગ્રામશ્રી અને ક્રાફ્ટરૂટ્સના સ્થાપક શ્રીમતી અનારબેન પટેલ,સાંસદ શ્રીમતી રંજનબેન ભટ્ટ, મેયર શ્રીમતી પિન્કીબેન સોની,ધારાસભ્યો સહિત પદાધિકારીઓ હાજર રહ્યા હતા.
