દેશની રાજધાની દિલ્હીમાં ઠંડીની લહેર સાથે ગાઢ ધુમ્મસનો કહેર ચાલુ છે. દિલ્હી-એનસીઆર આજે (મંગળવાર), 27મી ડિસેમ્બરે ગાઢ ધુમ્મસની ચપેટમાં આવી ગયું છે. ધુમ્મસના કારણે માર્ગો પર વાહનોની ગતિ ધીમી પડી ગઈ છે. આગામી 2 દિવસ સુધી ઠંડીનું મોજું રહેશે અને ઠંડીથી રાહત નહીં મળે તેવી શક્યતા હવામાન વિભાગે વ્યક્ત કરી છે.
સવારે દિલ્હીના પાલમ અને સફદરજંગમાં 50 મીટરથી ઓછી, રાજસ્થાનના ગંગાનગરમાં 25 મીટર, ચુરુમાં 50 મીટર, ઉત્તર પ્રદેશના બરેલીમાં 25 મીટર અને આગ્રા અને બહરાઇચમાં 200 મીટરથી ઓછી વિઝિબિલિટી હતી. જો કે ગઈકાલની સરખામણીએ આજે ઉત્તર ભારતના મોટાભાગના સ્ટેશનો પર લઘુત્તમ તાપમાનમાં નજીવો વધારો નોંધાયો છે. જ્યારે પંજાબ અને હરિયાણાના કેટલાક સ્ટેશનો પર પણ થોડો ઘટાડો જોવા મળ્યો હતો.
યુપીના ઘણા વિસ્તારોમાં પણ ગાઢ ધુમ્મસ છવાયેલું છે. બીજી તરફ, તાપમાનની વાત કરીએ તો, પાલમમાં લઘુત્તમ તાપમાન 5.6 ડિગ્રી સેલ્સિયસ, આયાનગરમાં 4 ડિગ્રી અને રિજમાં 4.4 ડિગ્રી સેલ્સિયસ નોંધાયું.
હવામાન વિભાગના જણાવ્યા અનુસાર, દિલ્હી સહિત ઉત્તર ભારતના મોટાભાગના રાજ્યો આગામી બે દિવસ સુધી શીત લહેરની લપેટમાં રહેશે. દિલ્હી-એનસીઆરના વિસ્તારોમાં ગાઢ ધુમ્મસના કારણે વિઝિબિલિટી ઘણી ઓછી નોંધાઈ હતી.
પંજાબના ભટિંડામાં સવારે 5.30 વાગ્યે 0 વિઝિબિલિટી નોંધાઈ હતી. જ્યારે અમૃતસર અને પટિયાલામાં 50 મીટર વિઝિબિલિટી હતી. આ સિવાય હરિયાણાના હિસાર, ચંદીગઢ અને અંબાલામાં માત્ર 25 મીટર વિઝિબિલિટી નોંધાઈ હતી.
દિલ્હી-એનસીઆરના ઘણા ભાગોમાં, લોકો ઠંડીથી બચવા માટે સવારે તાપણું કરતા જોવા મળ્યા. હવામાન વિભાગના જણાવ્યા અનુસાર આજે દિલ્હીમાં મહત્તમ તાપમાન 17 ડિગ્રી રહેવાની સંભાવના છે. આજે પણ હવામાન વિભાગે દિલ્હી-એનસીઆર, ઉત્તર પ્રદેશ, હરિયાણા અને પંજાબમાં ઠંડા પવનો સાથે લઘુત્તમ તાપમાનમાં ઘટાડો થવાની સંભાવના વ્યક્ત કરી છે.
આજે દિલ્હીમાં કેટલું રહેશે તાપમાન?
દિલ્હી-એનસીઆરમાં ઠંડી અને ઠંડીના મોજા વચ્ચે સવારે ધુમ્મસમાં વિઝિબિલિટી ઘટીને 100 મીટર થઈ ગઈ હતી. ઉત્તર ભારતના વિવિધ રાજ્યોમાં ધુમ્મસના કારણે દિલ્હી જતી ઘણી ટ્રેનો પણ તેમના નિર્ધારિત સમય કરતા ઘણા કલાકો મોડી ચાલી રહી છે. જો કે હજુ સુધી દિલ્હી એરપોર્ટ પર વિમાનોનું સંચાલન સામાન્ય છે.
IMDની આગાહી મુજબ દિલ્હીમાં આગામી ત્રણ દિવસ સુધી મધ્યમ ધુમ્મસ જોવા મળશે. આ સાથે તાપમાનમાં પણ નજીવો વધારો નોંધાઈ શકે છે. 28 ડિસેમ્બરથી 31 ડિસેમ્બર સુધી લઘુત્તમ તાપમાન 6 ડિગ્રી અને મહત્તમ તાપમાન 19 ડિગ્રી સેલ્સિયસ સુધી રહી શકે છે. IMDની આગાહી અનુસાર, વેસ્ટર્ન ડિસ્ટર્બન્સની અસરને કારણે, પર્વતો પર હિમવર્ષા સાથે નવા વર્ષે શિયાળામાં વધુ વધારો થવાની સંભાવના છે.
