ગુજરાતના રાજકારણમાં અને સામાજિક સમરસતાના ઇતિહાસમાં ગોધરાએ આજે એક સુવર્ણ પ્રકરણ ઉમેર્યું છે. ગોધરા નગરપાલિકાની ૨૦૨૬ની ચૂંટણીમાં વોર્ડ નં. ૭માં એક એવો ઉલટફેર જોવા મળ્યો છે જેણે સમગ્ર રાજ્યનું ધ્યાન ખેંચ્યું છે. આ વિસ્તારમાં એક પણ હિન્દુ મત ન હોવા છતાં, અપક્ષ ઉમેદવાર અપેક્ષાબેન સોનીએ મુસ્લિમ મતદારોના અતૂટ વિશ્વાસને સહારે જંગી બહુમતીથી વિજય મેળવીને ‘ગંગા-જમના તહેજીબ’નું ઉત્તમ ઉદાહરણ પૂરું પાડ્યું છે.
વર્ષ ૨૦૨૧ની ચૂંટણીમાં અપેક્ષાબેન માત્ર ૧૦૦ મતોથી પરાજિત થયા હતા. જોકે, હાર બાદ પણ તેઓ હિંમત હાર્યા વગર સતત પાંચ વર્ષ સુધી આ વિસ્તારના લોકોની વચ્ચે રહ્યા હતા. તેમના પરિવાર દ્વારા કરવામાં આવેલી સામાજિક સેવા અને લોકોના સુખ-દુઃખમાં ઊભા રહેવાની તેમની નિષ્ઠાને કારણે ૨૦૨૬ની આ ચૂંટણીમાં મુસ્લિમ સમાજે તેમને ૨૭૬૨ મતો આપીને વિજયી બનાવ્યા છે.
વર્ષ ૨૦૦૨ના રમખાણોની કડવી યાદો ધરાવતા આ શહેરમાં આજે એકતાની નવી સુવાસ ફેલાઈ છે. વોર્ડ નં. ૭, જે સંપૂર્ણપણે મુસ્લિમ વસ્તી ધરાવે છે, ત્યાં હિન્દુ મતદારોની સંખ્યા શૂન્ય હોવા છતાં અપેક્ષાબેનનો વિજય એ સાબિત કરે છે કે વિકાસ અને સેવાની સામે ધર્મની દીવાલો નાની પડે છે.
