પંકજ પંડિત
ઝાલોદના એક વેપારીની એમ.જી. હેક્ટર ગાડીમાં ગત રાત્રે અચાનક આગ ભભૂકી ઉઠતાં ગાડી સંપૂર્ણપણે બળીને ખાખ થઈ ગઈ હતી. આ ઘટનામાં કોઈ જાનહાનિ થઈ નથી. પરંતુ ગાડી માલિકને લાખો રૂપિયાનું નુકસાન થયું છે. આ ઘટના ઝાલોદ તાલુકાના પાવડી ગામે બની હતી.ઝાલોદના ગીતા મંદિર વિસ્તારમાં રહેતા વેપારી અબ્દુલ વહાબ અબ્દુલ રહીમ મતાદાર તેમની પત્ની સાથે પાવડી ગામે સાસરીમાં ગયા હતા. રાત્રે લગભગ 10 વાગ્યે તેમણે પોતાની સફેદ રંગની એમ.જી. હેક્ટર ગાડી (નંબર GJ-20-AQ-8686) ઘરની બાજુમાં પાર્ક કરી હતી. તેઓ ઘરમાં ગયા બાદ ગાડીમાંથી જોરદાર અવાજ આવતા અબ્દુલભાઈ બહાર દોડી આવ્યા હતા. બહાર નીકળીને જોતાં ગાડીમાં આગ લાગી હતી અને આગ ઝડપથી વિકરાળ સ્વરૂપ ધારણ કરી રહી હતી. અબ્દુલભાઈ અને તેમના સસરાએ તાત્કાલિક ઘરના બોરના પાણીથી આગ ઓલવવાનો પ્રયાસ કર્યો હતો. પરંતુ આગ કાબૂમાં આવી ન હતી.ઘટનાની જાણ થતાં તાત્કાલિક 112 પર કોલ કરતા ઝાલોદથી ફાયરબ્રિગેડની ટીમ ઘટનાસ્થળે પહોંચી હતી. ફાયરબ્રિગેડે પણ પાણીનો મારો ચલાવ્યો છતાં આગ ઓલવી શકાઈ નહોતી અને આખી ગાડી સંપૂર્ણપણે બળીને રાખ થઈ ગઈ હતી.આ ઘટના અંગે વેપારી અબ્દુલ વહાબે લીમડી પોલીસ સ્ટેશનમાં જાણવાજોગ ફરીયાદ નોંધાવી હતી. આકસ્મિક આગ લાગવાથી વેપારીને મોટું આર્થિક નુકસાન થયું હતું.
