વડોદરામાં એક ભુવો પુરાયો ત્યાં નવો ભૂવો પડવાની ઘટના સામે આવી છે. શહેરવાસીઓ ને એક પછી એક ભૂવાની ભેંટ મળતા લોકો અચરજમાં મુકાયા છે. ફતેગંત વિસ્તારમાં એક જગ્યાએ પડેલો ભૂૂવો પુરાયાના ગણતરીના કલાકોમાં જ નજીકમાં ભૂવો પડવાની ઘટના સામે આવી છે.
વડોદરા સહિત રાજ્યભરમાં ચોમાસાની રુતુમાં ભૂવા પડતા હોય છે. પરંતુ વડોદરામાં ભૂવા પડવાનો સિલસિલો શિયાળાના અંતમાં જ શરૂ થઇ ગયો હોવાનું જોવા મળી રહ્યું છે. સ્થિતી એ હદે વણસી છે કે, એક ભૂવો પુરાય ત્યાં તો ગણતરીના કલાકોમાં નવો ભૂવો પ્રગટ થઇ જાય છે. ગતરોજ શહેરના વાહનોના અવર-જવરથી અતિવ્યસ્ત રહેતા ફતેગંજ ચાર રસ્તાથી સેફ્રોન ટાવર તરફ જવાના રસ્તાના વળાંક પર ભૂવો પડ્યો હતો. જેણે પાલિકાની નબળી કામગીરીનો પુરાવો આપ્યો હતો. આ ભૂવો પુર્યાને હજી ગણતરીના કલાકો નથી થયા ત્યાં તો આજે તેની નજીકમાં જ વધુ એક ભૂવો પડ્યાનું સામે આવ્યું છે.જેને કારણે વગર ચોમાસે તંત્ર દ્વારા શહેરીજનોને ખાડાનગરીની ભેંટ મળી હોવાનું જોવા મળી રહ્યું છે. પાલિકાનું તંત્ર શહેરને નબળા રસ્તા આપી રહ્યું છે, તે વારંવાર પડતા ભૂવાઓ પરથી ફલિત થાય છે. લોકોની ચિંતા એ વાતે વધારી છે કે, જો શિયાળામાં આ પ્રકારની સ્થિતી હોય તો ચોમાસામાં તો કેવી ભયાવહ સ્થિતી હોઇ શકે છે. લોકોનો વિશ્વાસ જીતવા માટે પાલિકા તંત્ર શું કાર્યવાહી કરે છે તે જોવું રહ્યું !!
