સંકેત પંડ્યા – એડિટર
ગુજરાતના વડોદરામાં આજે ગંભીર દુર્ઘટના સર્જાઈ હતી. શહેરમાં આજે ગેસ સિલિન્ડર બ્લાસ્ટ થયો હતો જેમાં 2 મહિલાઓના મોત નિપજ્યા હતા જયારે 4 લોકોને ગંભીર રીતે દાઝી ગયા હોવાથી તેને સારવાર માટે નજીકની હોસ્પિટલ ખાતે ખસેડવામાં આવી હતી.
વડોદરામાં આજે દેવનગરમાં સવારે એક મકાનમાં સિલિન્ડર બ્લાસ્ટ થયો હતો અને આ ગેસ સિલિન્ડરમાં બ્લાસ્ટ થતા પ્રચંડ અવાજ આવ્યો હતો જેને કારણે સોસાયટીમાં હડકંપ મચી ગયો હતો અને લોકો પોતાની ઘરની બહાર દોડી આવ્યા હતા. આ બ્લાસ્ટથી સોસાયટીની ધરા ધ્રુજી ગઈ હતી. આ બનાવની જાણ ફાયર બ્રિગેડને થતા ફાયરની ટીમ સ્થળ પર પહોંચી ગઈ હતી.
ફાયર બ્રિગેડની ટીમ દ્વારા કાટમાળ નીચે દાવાયેલા લોકોને બહાર કાઢવાની કામગીરી હાથ ધરાઈ હતી અને આ ગંભીર દુર્ઘટનામાં બે મહિલા લીલાબેન ચૌહાણ અને શંકુતલાબેન જૈનનું મોત નીપજ્યું હતું. આ ઘટનામાં 4 લોકો ગંભીર રીતે દાઝી ગયા હતા અને તેઓને સારવાર અર્થે હોસ્પિટલમાં ખસેડવામાં આવ્યા હતા. આ ગેસ સિલિન્ડર ફાટવાની ઘટનાથી સોસાયટીના 6 મકાનોને નુકશાન થયું છે હાલ પોલીસ દ્વારા FSL મદદથી વધુ તપાસ શરૂ કરવામાં આવી છે.
