સંકેત પંડ્યા – એડિટર
વડોદરા મહાનગરપાલિકાની દબાણ શાખા દ્વારા આજરોજ મોટી કાર્યવાહી હાથ ધરવામાં આવી. જેમાં શહેરના વાઘોડિયા રોડ બાયપાસ પાસે ગેરકાયદેસર બાંધકામો છે તેને દૂર કરવા માટે પાલિકાની દબાણ શાખા ટીમ પહોંચી હતી. મહાનગરપાલિકાની ટીમ પહોંચે એ પહેલા જ લોકોએ પોતાની લારીઓ હટાવવાનું શરૂ કરી દીધુ હતુ. દબાણકારોને પાલિકાની ટીમ આવવાના ભણકારા વાગતા જ જાતે દબાણો દૂર કરવામાં લાગ્યા હતા. અહીં પતરા શેડ અને કેબીન પણ ઉભી કરવામાં આવી હતી. પાલિકાની દબાણ શાખાની ટીમે આ તમામ દબાણો દૂર કર્યા હતા. જો કે દબાણો દૂર કરતાં રહીશોમાં ભારે રોષ જોવા મળ્યો હતો. પોતાની રોજીરોટી છીનવાઇ જતા રહીશો રોષે ભરાયા હતાં અને મિડીયા સામે રડી પડ્યા હતા. રહીશોનું કહેવુ છે કે પાલિકાની ટીમ અચાનક આવી પહોંચી,પહેલા જાણ કરી હોત તો અમે જાતે જ અમારી લારી હટાવી દેતા પણ પાલિકાની ટીમ દ્વારા લારી હટાવી સામાન જપ્ત કરવામાં આવ્યો હતો. પાલિકાની દબાણ શાખા ટીમના અધિકારીએ જણાવ્યુ હતુ કે વાઘોડિયા બાયપાસ પાસે લારી ગલ્લાનાં શેડ બનાવી ટ્રાફિકની સમસ્યા સર્જાય છે. આ ટ્રાફિક સમસ્યાને લઇને દબાણો દૂર કરવામાં આવ્યા છે ગઇ કાલે ગોલ્ડન ચોકડીથી એરપોર્ટ સુધી, દેણા ચોકડી પાસે દબાણો દૂર કરવામાં આવ્યા હતા. આજે વાઘોડિયા બાયપાસ પાસે ટ્રાફિકને નડતરરૂપ દબાણો દૂર કરવામાં આવ્યા છે. ટ્રાફિકને નડતરરૂપ લારી ગલ્લા અને શેડ બનાવવામાં આવ્યા છે તેની દૂર કરવાની ઝુંબેશ ચાલી રહી છે.
આ પહેલા પણ પાલિકાની ટીમ દ્વારા શહેરમાં અનેક જગ્યાએ દબાણો દૂર કરવામાં આવ્યા છે.
