હરિયાણાના કરનાલમાં રાહુલ ગાંધીના નેતૃત્વમાં આજે સવારે કોહાંડ ગામથી ભારત જોડો યાત્રા શરૂ થઈ. કોંગ્રેસ સાંસદ રાહુલ ગાંધીની સાથે પ્રદેશ કોંગ્રેસના ઘણા મોટા નેતાઓ અને કાર્યકરો સામેલ છે. હરિયાણામાં રાહુલ ગાંધીની ભારત જોડો યાત્રાનો આજે ત્રીજો દિવસ છે. ભારત જોડો યાત્રા શુક્રવારે પાણીપત પહોંચી હતી. આ દરમિયાન રાહુલ ગાંધી સાથે પૂર્વ મુખ્યમંત્રી ભૂપેન્દ્ર સિંહ હુડ્ડા, પ્રદેશ કોંગ્રેસ અધ્યક્ષ ચૌધરી ઉદયભાન, કુમારી સેલજા અને દીપેન્દ્ર હુડ્ડા સહિત ઘણા નેતાઓ પણ હાજર હતા.
પાણીપતમાં એક જનસભાને સંબોધતા કોંગ્રેસના પૂર્વ અધ્યક્ષ રાહુલ ગાંધીએ શુક્રવારે મોંઘવારી, બેરોજગારી અને ખેડૂતોના મુદ્દાઓ પર નરેન્દ્ર મોદી સરકાર પર નિશાન સાધ્યું અને આરોપ લગાવ્યો કે હવે બે હિન્દુસ્તાન બની ગયા છે, એક ખેડૂતો અને મજૂરો માટે છે અને બીજું 200- 300 અમીરો માટે છે.
કોંગ્રેસ નેતા રાહુલ ગાંધીએ શુક્રવારે અગ્નિવીર યોજનાને લઈને કેન્દ્ર સરકાર પર નિશાન સાધ્યું અને કહ્યું કે હરિયાણા “બેરોજગારીમાં ચેમ્પિયન બની ગયું છે અને યુવાનો માટે કોઈ નોકરી નથી.” ભારત જોડો યાત્રા દરમિયાન હરિયાણાના પાણીપતમાં એક રેલીને સંબોધિત કરતી વખતે તેમણે કહ્યું કે અગાઉ એક સૈનિક 15 વર્ષ દેશની સેવા કરતો હતો અને તેને યોગ્ય તાલીમ અને નિવૃત્તિના લાભો આપવામાં આવતા હતા પરંતુ હવે 5 વર્ષ પછી તે બેરોજગાર થઈ જશે.
તેમણે કહ્યું કે પાણીપત પહેલા મધ્યમ મેન્યુફેક્ચર્સનું હબ હતું, પરંતુ હવે પરિસ્થિતિ બદલાઈ ગઈ છે. ગાંધીએ કહ્યું, નોટબંધી, GST, જે નીતિઓ ન હતી, પરંતુ નાના અને મધ્યમ ઉદ્યોગોને નષ્ટ કરવાના શસ્ત્રો હતા. કોંગ્રેસ નેતાએ આરોપ લગાવ્યો કે દેશની સંપત્તિ 200 થી 300 લોકો પાસે છે. ભારત જોડો યાત્રા હાલમાં હરિયાણામાં છે જે પંજાબ, હિમાચલ પ્રદેશમાંથી પસાર થશે અને જમ્મુ-કાશ્મીરમાં સમાપ્ત થશે.
